“नवी ऊर्जा, नवा उत्सव आणि जनसेवेचा दृढ संकल्प!”शिवतीर्थ भाजपा मध्यवर्ती कार्यालयाचा दिमाखदार उद्घाटन सोहळा संपन्न…!
पाचोरा (प्रतिनिधी): जनसेवा, राष्ट्रभक्ती आणि संघटनशक्तीचा नवा अध्याय ठरलेला शिवतीर्थ भाजपा मध्यवर्ती संपर्क कार्यालयाचा उद्घाटन सोहळा अतिशय भव्य आणि उत्साहपूर्ण वातावरणात संपन्न झाला. महाराष्ट्र राज्याचे जलसंपदा तसेच आपत्ती व्यवस्थापन मंत्री मा. ना. गिरीशभाऊ महाजन यांच्या शुभहस्ते आणि चाळीसगावचे कार्यसम्राट आमदार मा. श्री. मंगेशदादा चव्हाण यांच्या प्रमुख उपस्थितीत हा सोहळा पार पडला. या वेळी उपस्थितांना मार्गदर्शन करताना भाजपा नेत्या मा. वैशालीताई सुर्यवंशी म्हणाल्या, “आजचा दिवस फक्त कार्यालयाच्या उद्घाटनाचा नाही, तर भाजपाच्या विचारांचा पाया अधिक भक्कम करण्याचा दिवस आहे. हे कार्यालय जनतेसाठी खुले असून सेवा, समर्पण आणि राष्ट्रभक्तीच्या प्रवासाचा हा प्रारंभ आहे.” आमदार मंगेशदादा चव्हाण यांनी आपल्या मनोगतात सांगितले की, “आगामी जिल्हा परिषद, पंचायत समिती आणि नगरपालिकांच्या निवडणुकीत जर आपण संघटितपणे, समन्वयाने आणि ताकदीने लढलो, तर भाजपाचा विजय निश्चित आहे.” मंत्री गिरीशभाऊ महाजन यांनी आपल्या भाषणात सांगितले की, “मा. वैशालीताई सुर्यवंशी यांच्या पुढाकारातून सुरू झालेले हे भाजपा मध्यवर्ती कार्यालय जनसेवेचे केंद्र ठरेल. केंद्रात मोदीजी आणि राज्यात देवेंद्रजी यांच्या नेतृत्वाखाली महाराष्ट्रासह देशात विकासाची घोडदौड सुरू आहे. आगामी निवडणुकीत एकजुटीने काम करून भाजपाचा भगवा पुन्हा फडकवूया.” या सोहळ्याला श्री. अमोल नाना पाटील-जिल्हा सरचिटणीस श्री. मधुकरभाऊ काटे – जिल्हा उपाध्यक्ष, श्री. सुभाषभाऊ पाटील -जिल्हा उपाध्यक्ष श्री. गोविंद शेलार- नगरदेवळा मंडळ तालुका अध्यक्ष, सौ. शोभाताई तेली – पिंपळगाव मंडळ तालुका अध्यक्षा, श्री. दीपक माने-पाचोरा शहर मंडळ तालुकाध्यक्ष, श्री. अनिल पाटील- गुढे-कजगाव मंडळ तालुका अध्यक्ष तसेच श्री. विनोद नेरकर -भडगाव मंडळ तालुका अध्यक्ष यांच्यासह असंख्य पदाधिकारी व कार्यकर्त्यांची मोठ्या संख्येने उपस्थिती होती. उद्घाटन सोहळ्यात अनेक नव्या कार्यकर्त्यांनी भाजपामध्ये पक्षप्रवेश करून राष्ट्रसेवेचा संकल्प घेतला. जयजयकार, टाळ्यांचा गजर आणि घोषणांनी परिसर दुमदुमून गेला.
