युगंधरा पाटीलचा यशस्वी प्रवास – MPSC मध्ये राज्यात अव्वल
पाचोरा (प्रतिनिधी) –
मेहनत, चिकाटी आणि ध्येयाप्रती असलेली निष्ठा यांचा संगम म्हणजे कु. युगंधरा राजेंद्रसिंग पाटील. जयकिसान कॉलनी, पाचोरा येथील रहिवासी असलेल्या या प्रतिभावान विद्यार्थिनीने शैक्षणिक क्षेत्राबरोबरच स्पर्धा परीक्षांमध्येही झळाळती कामगिरी करून शहर व परिसराचा मान उंचावला आहे.
शैक्षणिक यशाची शिखरे
दहावी व बारावी परीक्षेत विशेष प्राविण्य मिळवून शैक्षणिक प्रवासाची भक्कम पायाभरणी झाली. त्यानंतर बहिणाबाई चौधरी उत्तर महाराष्ट्र विद्यापीठाच्या इंग्रजी विषयात तिने गोल्ड मेडल पटकावले. पदव्युत्तर परीक्षेत विद्यापीठात द्वितीय क्रमांक मिळवत तिच्या गुणवत्तेची ठोस छाप पडली. यानंतर विद्यापीठाच्या बोर्ड ऑफ स्टडीजवर तिची नेमणूक होणे, हीदेखील तिच्या कर्तृत्वाची दखल होती.
स्पर्धा परीक्षांतून उल्लेखनीय कामगिरी
युगंधराने स्पर्धा परीक्षांतही तितकाच झंझावाती ठसा उमटवला आहे. सप्लाय इन्स्पेक्टर, व्हिलेज रेव्हेन्यू ऑफिसर तसेच महिला व बालविकास विभागात पर्यवेक्षिका पदावर तिची निवड झाली असून ती सध्या चाळीसगाव येथे कार्यरत आहे.
MPSC निकालात राज्यात अव्वल
अलीकडेच जाहीर झालेल्या MPSC निकालात युगंधराने ऐतिहासिक कामगिरी करून राज्यभरात नावलौकिक मिळवला आहे.
STI (EWS Female वर्ग 2) पदासाठी महाराष्ट्रात प्रथम क्रमांक
ASO पदासाठी महाराष्ट्रात द्वितीय क्रमांक
तसेच वर्ग 1 पदासाठीची तिची मुलाखत नुकतीच पार पडली असून तिच्या आत्मविश्वास व अभ्यासू वृत्तीचे हे ठळक उदाहरण ठरले आहे.
भव्य सत्कार समारंभ
युगंधराच्या या उल्लेखनीय यशाचा गौरव करण्यासाठी नवदुर्गा महिला मंडळ दुर्गोत्सव मंडळ, जयकिसान कॉलनी, भडगाव रोड, पाचोरा यांच्या वतीने भव्य सत्कार कार्यक्रम आयोजित करण्यात आला. या प्रसंगी श्रीमती कमलाताई रघुनाथ पाटील, महिला मंडळातील सर्व सभासद तसेच प्रभागातील जनसेवक बंडूभाऊ केशव सोनार उपस्थित होते.
प्रेरणादायी आदर्श
युगंधरा पाटीलचा हा यशस्वी प्रवास केवळ तिचे वैयक्तिक समाधान नाही, तर समाजातील प्रत्येक तरुण-तरुणीसाठी प्रेरणादायी दीपस्तंभ ठरेल. तिची मेहनत, चिकाटी व ज्ञानसंपन्नता भावी पिढ्यांसाठी मार्गदर्शक ठरेल, असा विश्वास व्यक्त करण्यात आला.
