बॅडमिंटन मध्ये ही गुरुकुलच्या मुले व मुलींनी मारली बाजी; विद्यार्थ्यांची जिल्हास्तरीय स्पर्धेसाठी निवड
पाचोरा येथे आयोजित तालुकास्तरीय 14 वर्षांखालील बॅडमिंटन स्पर्धेत गुरुकुल इंटरनॅशनल स्कूलच्या विद्यार्थ्यांनी आपली चमकदार कामगिरी दाखवत सर्वांचे लक्ष वेधले. या स्पर्धेत त्यांनी उत्कृष्ट खेळाचे प्रदर्शन करत अनेक प्रतिस्पर्ध्यांवर मात करत जिल्हास्तरीय बॅडमिंटन स्पर्धेसाठी आपले स्थान निश्चित केले आहे.
ही स्पर्धा पाचोरा तालुक्यातील विविध शाळांमधील, इंग्रजी, सेमी इंग्रजी व जिल्हा परिषदेच्या विद्यार्थ्यांच्या सहभागाने पार पडली. यामध्ये गुरुकुल इंटरनॅशनल स्कूलचे सत्यजित जैन, तेजस सपकाळ, पृथ्वीराज परदेशी, केतन महाले, कौस्तुभ चौधरी तसेच शताक्षी माळी, तृप्ती महाजन, साक्षी पवार, रीषिका पाटील व वेदिका पाटील या विद्यार्थ्यांनी उत्कृष्ट कामगिरी बजावत या स्पर्धेत त्यांचे निर्विवाद वर्चस्व पुन्हा एकदा सिद्ध केले आहे.
विद्यार्थ्यांच्या या यशाबद्दल गुरुकुल इंटरनॅशनल स्कूलचे प्राचार्य प्रेम शामनानी यांनी सर्व विजेत्या विद्यार्थ्यांचे अभिनंदन केले. “विद्यार्थ्यांनी मेहनतीने आणि समर्पणाने खेळाचे प्रशिक्षण घेतले असून त्याचेच हे फळ आहे. आगामी जिल्हास्तरीय स्पर्धेसाठी त्यांना आमच्या शुभेच्छा,” असे त्यांनी सांगितले.
या विद्यार्थ्यांना क्रीडा शिक्षिका साक्षी पवार व क्रीडाशिक्षक निरंजन राठोड यांचे विशेष मार्गदर्शन लाभले असून त्यांच्या प्रशिक्षणामुळेच विद्यार्थ्यांनी ही घवघवीत कामगिरी साध्य केली आहे.
तालुकास्तरावर मिळवलेले हे यश विद्यार्थ्यांच्या पुढील वाटचालीसाठी प्रेरणादायी ठरणार असून जिल्हास्तरावरही ते आपली गुणवत्ता सिद्ध करतील, असा विश्वास शाळेतील इतर शिक्षकांनी व्यक्त केला आहे.
तसेच पाचोरा तालुका स्तरीय क्रीडा स्पर्धेत कॅरम स्पर्धेत विजय पाठोपाठ सलग दुसऱ्या दिवशीही बॅडमिंटन स्पर्धेत गुरुकुल इंटरनॅशनल स्कूलच्या मुले व मुली दोन्ही संघाना घवघवीत यश मिळाल्या मुळे क्रीडा शिक्षक व विद्यार्थ्यांचे अभिनंदन करण्यात आले.
