जळगाव महानगरपालिका कर्मचाऱ्यांमध्ये सायबर सुरक्षिततेबाबत जनजागृती
जळगाव | प्रतिनिधी
डिजिटल व्यवहारांचा वाढता वापर आणि त्यासोबत वाढणाऱ्या सायबर फसवणुकीच्या घटनांबाबत नागरिकांना सतर्क करण्यासाठी कवयित्री बहिणाबाई चौधरी उत्तर महाराष्ट्र विद्यापीठ (KBCNMU), जळगाव आणि Quick Heal Foundation यांच्या संयुक्त विद्यमाने जळगाव महानगरपालिकेच्या कर्मचाऱ्यांसाठी सायबर सिक्युरिटी जनजागृती कार्यक्रम घेण्यात आला.
या कार्यक्रमात महानगरपालिका कर्मचाऱ्यांना विविध सायबर फ्रॉडबाबत माहिती देण्यात आली. फसवणुकीपासून वाचण्यासाठी आवश्यक खबरदारी, संशयास्पद कॉल्स, मेसेज आणि लिंक ओळखण्याचे मार्ग तसेच सायबर गुन्ह्याची घटना घडल्यास कोणती तातडीची पावले उचलावीत, याविषयी मार्गदर्शन करण्यात आले.
कार्यक्रमादरम्यान कर्मचाऱ्यांना डिजिटल व्यवहार सुरक्षितपणे करण्याचे महत्त्व समजावून सांगण्यात आले. तसेच OTP, PIN, पासवर्ड आणि बँक खात्याशी संबंधित गोपनीय माहिती कोणासोबतही शेअर करू नये, याबाबत जागरूक करण्यात आले.
या उपक्रमात स्नेहल पाटील आणि वैष्णवी पाटील यांनी सक्रिय सहभाग घेत कर्मचाऱ्यांमध्ये सायबर सुरक्षेबाबत जनजागृती केली. महानगरपालिका कर्मचाऱ्यांनीही कार्यक्रमाला चांगला प्रतिसाद देत सायबर सुरक्षेबाबत माहिती जाणून घेतली. या कार्यक्रमासाठी Dr. R. B. Amale Sir यांचे मार्गदर्शन लाभले.
